Газетіміздің №08(196) нөмірінде Әнші аруымыз Қарақат Әбілдинаның Сауд Араб елі патшайымының арнайы шақыруымен баратыны жайлы сұхбат жарияланған еді. Бұл күнде әнші қызымыз сол сапардан туған жерге қайта оралып, қайнаған өнердің қызу жұмысына кірісіп кетіпті. Бойындағы өнерімен, әйелге тән сұлулығымен арабтарды тәнті еткен Қарақаттың Сауд Араб елінен алған әсері орасан.

ЖОЛ САПАРДАН КЕЙІНГІ ОЙЛАР
- Қарақат әпке, Сауд Араб еліндегі концерт қалай өтті?
- Жаман болған жоқ. Шамасы 45-тей мемлекеттің өкілдері қатысты. Өз үрдістері бойынша әр елден бір-бір өкіл ғана қатысады екен. Соның ішінде Қазақстанның атынан мен қатыстым. Концерт үш жарым мың адам сиятын үлкен сарайда өтті. Концертті көруге келушілердің көптігі сонша, ішінде бос орын болған жоқ. Ол жақта әйел мен ерлер бірігіп жүрмейді екен. Әйелдер бөлек, ерлер бөлек жүреді. Сондықтан мен қатысқан шарада да ер азаматтар болған жоқ. Патшайымның қатысуымен тек қыз-келіншектер ғана болды. Концертке ең бетке ұстар, құрметті адамдар шақырылған екен. Байлар да болды. Бұл шарадан түскен қаражатты жетім балаларға, мүгедектерге, қайырымдылық қорына аударады. Үлкен ас беріліп жатты. Бұл жылына бір-ақ рет болатын шара екен. Оған Индия, Япония, Тайван, Филиппин сынды өте көп мемлекеттің өкілдері қатысты. Концерт өте тұшымды өтті. Жалпы, маған ұнады.
- Ондағы тыңдарманның қазақ әніне деген ықыласы қандай екен?
- Бұрын аса қатты таныс болмағаны көрініп тұр. Таныстырылым ретінде, мен шығар алдын үлкен экраннан Қазақстан туралы кішкене видеоролик көрсетілді. Бірақ, бірден ұлттық киімде, ұлттық аспапта, жетігенмен халық әнін орындағанымда ерекше әсерленді. Құдайға шүкір, өте жақсы, жылы қабылдады. Сый-сияпатсыз да болған жоқпыз. Ең бастысы, ойдағыдай өтті.
- Жалпы, Сауд Араб елі сізге қандай ерекшелігімен ұнады?
- Бұл дінге көп көңіл бөлетін мемлекет екен. Сондықтан рухани жандүниеміз тазарып қайтқандай әсерде болдық. Қайрат Қайырбекұлы деген елшіміз де керемет кісі екен. Күлпан есімді жары бар. Бізді өте жақсы қарсы алды. Біз сол өзіміздің елшілікке тоқтадық. Олар астымызға көлік беріп, қаланың керемет жерлерін аралатып, бізге керемет қызмет көрсетті. Бізге елшілердің көрсеткен құрметі ретінде Меккеге бару жолдамасы бұйырды. Әрине, бұл біз үшін үлкен мәртебе. Кіші қажылық дейміз ғой, Меккеге барып, жолын жасап қайттық. Жұма күні сонда түнеп, тілегімізді тіледік.
Әдемі есте қалатын сәттер көп болды. Соның бірі өздерінің дәстүрлі киімдерін киюіміз. Біз “хиджаб” дейміз ғой. Ал онда оны “абая” деп атайды екен. Сол абаяны барғаннан, кеткенше киіп жүрдік.
- Өзіңіз өнер көрсеткен патша мен патшайым жайында айтып өтсеңіз...
- Бұл патшайымның ұйымдастыруымен болып жатқан шара. Патшаның бесінші әйелі екен. Жасы алпыстан асқан үлкен кісі. Сол кісінің ұйымдастыруымен бұл шара жылына бір-ақ рет болады. Жалпы, ол жақта батыстық мәдени іс-шаралар жоқ деуге болады-ау. Көшелерінде музыка, музыка болғанда да тарс-тұрс еткендерді тыңдауға мүлде болмайды. Мен қатысқан шарада да ондай даңғырлаған ешқандай артық дыбыс болған жоқ. Әркім өзінің ұлттық аспабымен халық әнін орындады.
- Сауд Араб елінен қандай түйін түйіп қайттыңыз?
- Өте маған ұнағаны, тағыда айтамын, жан дүниеміз тазарып қайтты. Ол жерде өзіңнің пенде екеніңді сезінесің. Ешқандай жылтыраған дүние жоқ. Адамдардың үстіндегі бар киімі екі метр мата ғана. Адам өлгенінде екі метр ақ матаға орап, жерлейсің ғой. О дүниеге екі метр матадан басқа ештеңе де алып кетпейді. Міне, олар соны тіршілікте көрсетеді. Ерлер екі метр ақ матаға, әйелдер қара матаға оранып жүреді. Біз де солай оранып жүрдік. Әр елдің өз заңы бар. Сен сол елде жүргеннен кейін, сол елдің топырағын басқаннан кейін сол елдің шартымен жүруің керек. Сен саяхатшысың ба, қонақсың ба ешқандай айырмашылық жоқ. Сол елдің заңына бағынып, киімін кию керексің. Тіпті, шашыңның бір талы да көрінбеуі керек. Оған олар тым қатал қарайды екен.
Біз Реат деген қаласында болдық. Өте діни жер. Онда бес уақыт намаз кезінде бүкіл қозғалыс тоқтайды. Дүкендердің барлығы жабылады, көліктер жүрмейді. Қыбырлыған тіршілік атаулының барлығы тоқтап, үнсіздік жайлайды. Тек оқылып жатқан намаздың ғана даусы шығып тұрады. Бұл кезде ешкім ештеңеге алаңдамай, кішкентай баладан, еңкейген кәріге дейін намаз оқиды. Мұндай жерге барғанда әрине, сіз тек қана Алланы ойлап, өзгеше әсерде боласыз.
Өмірі көрмеген Меккеге де бірінші рет аяқ бастық. Жұма күні сонда барып, намаз оқып, керемет күй кештік. Жалпы, бұл сапардан ерекше көңіл-күймен оралдық.
- Көрген-білгеніңізді оқырманмен бөліскеніңізге, үлкен рахмет! Өнеріңіз өрлей берсін!
Сұқбаттасқан:
Гүлбақыт ҚОЙЛЫБАЕВА.

Айгүл Иманбаева: МЕНІҢ БАРЫМ ДА, БАЙЛЫҒЫМ ДА - АНАМ

Жүрегі таза, жаны жайсаң, әдемі де, өнерлі қыздарымыздың бірі Айгүл Иманбаева. Оны халық жақсы таниды. Әсем де, түрлі образдарымен де халықтың қалаулысына айналған Айгүлдің алар асуы әлі алда. Оған әртістің төмендегі берген сұхбаты куә.

- Жаңа жыл басталғалы бері шығармашылығыңызда қандай өзгерістер болып жатыр?

- Жаңа әндер жазып жатырмын. Назира Бердалының сөзіне, Ринат Аубакировтың әніне жазылған “Мен сенің бақытыңмын” деген әнге бейнеклип түсіргелі жатырмын. Алла бұйыртса, бір-екі күннің ішінде әнім дайын болады. Одан кейін бейнеклип қамына кірісеміз. Тағы бір жаңалығым, сәуір айының басында “Таңғы елес” атты алғашқы үн таспам шығады. Оның ішінде әндер жинағым ғана емес, клиптер жинағы және жеке концертім де бар.

- Жалпы, ән таңдауда, киім киюде кімнің көмегіне жүгінесіз?

- Продюсерім Баян Есентаевамен ақылдасамын. Ерлан Жолдасбеков, Аида Қалменова есімді стилистерім, Мария Ремер, Кенжебек Каденов есімді визажистерім бар. Олардың да көмегі орасан.

- Гастрольдік сапарға көп шығасыз. Осы орайда анаңыз тәрбиелеп жатқан балаңыз жайлы айтып кетсеңіз...

- Ұлым жетпіс пайыз десем де болады, анамның тәрбиесінде. Әжесінің тәрбиесін алған бала да жаман болмайды деп ойлаймын. “Уақыт бөлмеймін, күндіз-түні даладамын” деп айтпаймын. Күндіз жұмыста болғаныммен, түнде үйдемін. Бала тәрбиесіне де уақыт бөлемін. Жұмыстан ерте келген күндері сабағын қадағалап, демалыстарымның барлығын балама арнаймын.

- Ұлыңыз Асылжан онға толып қалды. Сіздің өнеріңізге өзінің ой-пікірлерін айтып отыратын шығар?

- Әрине айтады. Киіміме, әндеріме қатысты, ойнаған спектакльдерімді “ мама, мына жерде былай болыпты” деп, өз пікірін айтып отырады. Оның айтқан ойымен мен де санасып отырамын.

- Алда мереке келе жатыр, кімнен сыйлық күтесіз?

- Үлкен сыйлықты, әрине халықтан күтемін. Сүйгенімнен күтемін. Басқа... болды...

- Халыққа “өнегелі келін” болып танылған Айгүл қашан келін атанады екен?

- Алланың бұйырған күні. Ол күнде алыс емес шығар.

- Шетел жұлдыздары өздерінің басынан өткен мұңдары мен қуаныштарын тыңдармандарымен бөлісіп отырады. Ал сіз ше, бөлісер ме едіңіз?

- Мен негізі көп ішіндегі жалғыз жанмын. Өзімдегі ішкі сырды сыртқа шаша бермеймін. Сырттағы менің келбетім бөлек те, ал ішімде болып жататын жағдай бөлек. Оны кез-келген адамға та бере алмайсың. Әр адамның ойы, ойлау деңгейі әр түрлі. Айтқаныңды іліп әкетіп, ертең оны басқа адамға басқаша айтып жүретіндер де жоқ емес. Сондай нәрседен қорқамын. Саусақпен санарлықтай екі-үш адаммен ғана сырласамын. Онда да жақын адамыммен ғана. Ал жалпы ортада, мен ешкіммен сыр бөліспейтін адаммын.

- Көптеген әншілер “туған-туыс, бауырларымның бәрін сүйреп келемін” деп жатады. Ал сіз...

- Менде де дәл сол әңгіме, сол ән. Қаражатымыз асып-тасып жатпаса да, жақындарымыздың барлығына көмектескіміз келіп тұрады. Мен өте тынымсыз адаммын. Телевидение саласы болсын, театр, кино саласы, эстрада болсын, бәрін бірге алып келе жатырмын. Қазір енді бизнеске қарай бағыт алған бетім бар. Бизнес болғанда шоу-бизнес. Бірақ, ол жайында әзір ашып ештеңе де айта алмаймын.

- “ Айгүл театрда сомдаған образдан көпке дейін арыла алмай жүреді” дегенді жиі естиміз...

- Ол жалғыз менің басымда ғана емес, барлық әртістердің басында болатын құбылыс. Спектакльден кейін бірден өз-өзіңе келу, жиналу деген оңай емес. Екі сағат бойы біреудің жанына кіріп, біреудің ойын сезініп, спектакль біткеннен кейін қайта бұрынғы Айгүл бола салу қиын. Қайта өзіңе келу үшін, кемінде қырық минут, бір сағат уақыт кетеді.

- Театрда сомдап жүрген рөлдеріңіздің ішінде жаныңызға жақын келетін рөл бар ма?

- “Пай-пай, жас жұбайлар-ай” деген спектакльдегі Ғазизаның образы менің жаныма өте жақын. Ғазиза түбі тесік шелек секілді өзі сондай аңқылдақ, сенгіш, ақкөңіл, ашық келіншек. Оның сенгіштігі, ғашықтығы менің табиғатыммен сәйкес. Сол ақкөңіл, аңқылдақ, сенгіш мінезімнен өзім қатты күйгенмін...

- Сенгішпін деп қалдыңыз...

- Өмірдің өзі бір орнында тұрмайды. Адам да солай. Жас өсе келе өмірдің ағымына қарай көп нәрсеге төселеді, суынады, қатаяды. Менікі де сондай құбылыс болу керек. Осыдан бес-алты жыл бұрынғы Айгүл емеспін. Дегенмен, судан бір шықсам, жағалауыма екі рет қараймын. Бет-алды сене бермеймін. Оның үстіне, психолог болдық қой. Қазір әр адамның қимылынан, көзінен, үнінен түйін түйетін болдым.

- Екі-үш рет киноға түстіңіз. Тағы да түсу ойыңызда жоқ па?

- Коммерциялық кино дейміз ғой, сондай бір “Ход королевы” деген орысша киноға түскелі жатырмын. Онда басты рөлдегі қызды сомдаймын. Бұл кинодағы рөлім мына “Ұят болмасындағы” келіннің рөліне 180 градусқа қарама-қайшы. Кинода, қыздың кішкентай кезінде, бизнесмен әкесін өлтіріп кетеді де, ол өскен соң әкесін өлтіргендерден кегін алады. Негізі идеясы жақсы, өте қызықты кино.

- Әрі әншісіз, әрі театр, кино саласында да өнер көрсетесіз. Жүргізушілігіңіз тағы бар. Барлығын бірдей алып жүру қиын емес пе?

- Өз ісіңді жақсы көрсең, қиын емес. Менің өзім ләззаттанып, рахаттанып істеймін жұмысымды. Кеш батса, таңның атқанын күтемін. “Ертең не істеймін? Қайда барамын?” деп ертеңгі күнімді жоспарлап қоямын. Содан шығар үлгеретінім. Тек, Алла қуат берсін. Деніміз сау болып, еліміз тыныш болса барлығына үлгеруге болады екен.

- Соңғы кездері жарнамалардан көрініп жүрсіз...

- Жарнамаға көп түскен емеспін. “Фудмастерді жарнамалап бір рет түскенім бар. Косметиканы, сусабындарды жарнамалауға ұсыныстар болды. Бірақ, оған менің дәл сол кезде жұмыс уақытым сәйкес келмеді. Егер жақсы ұсыныстар болып жатса, жарнамаға неге түспеске?

- Жаңа бір сөзіңізде “ертеңгі күнімді жоспарлаймын дедіңіз. Күн тәртібімен жүресіз бе?

- Иә. Кешке үйге келгенде, ертеңгі күнімді сағатына дейін бір жазып қоямын. Егер не істейтінімді күн тәртібіне дазып қоймасам, жүгенсіз, сызықтан шығып кеткендей боламын. - Күн тәртібін жазатын адам күнделік те жазатын шығар. Әлде, уақыт жоқ па?- Күнделік жазамын. Күнделік менің ең жақын сырласым. Ешкімге айтпайтын сырларымды сонда тізіп отырамын. Күнделікті мен төртінші кластан бастап жазамын. Бала кезімде өлең де жазатынмын. Балалық па, әлде ұяңдық па білмеймін, кезінде анамнан ұялып, талайын жыртып тастағанмын. Кейін жазбай кеттім. Мүмкін, әртістік-шеберлік жағы басым түскен болар. Негізі журналистика факультетін оқығанмын ғой. Содан болар, ойымды қағаз бетіне түсіргенді жақсы көремін. Мақала жазғым келеді. Бірақ, халықтан ұялып жүрмін.

- Әдеби кітаптар оқитын шығарсыз...

- Күнделікті ақпаратты жібермеймін. Ал кітап оқуға уақыт бола бермейді. Көбіне гастрольдік сапарға шыққан кезде оқимын. Пойыздың ішінде жатып алып оқысаң, ой, рахат! Әзілхан Нұршайықовтың “Мәңгілік махаббат жыры” атты жаңа кітабын оқыдым. Кітапты оқып бітіргенше көзімнің жасын сүртетін бір бет орамал жетпеді. Әзілхан аға әңгімені суреттеп жазатын керемет жазушы ғой.

- Сіз үшін сахнада ән айтып, халықтың көңілінен шығатын әнші болу қиын ба, әлде, өмірде инабатты келін, ибалы әйел, қадірлі ана болу қиын ба?

- Қиын сұрақ екен. Мен үшін өмірде ана болу, жар болу, әйел болу қиындау секілді. Білмеймін енді, менің басымнан ондай жағдай түбегейлі өткен де емес қой. Бір сәтте болды, оның өзі өтті де кетті. Сондықтан болар, өмір мен үшін ну орман, адасып кететіндей қорқып тұрамын. “Қалай болады екен, не болады екен?” деп көп ойланамын. Әлде жасың өскен сайын бәрін ақылға салып, көп ойланатын боласың ба, білмеймін. Әнші болу оған қарағанда жеңілдеу секілді. Егер бойыңда Алла берген талант болса, оны ұштағанның несі қиын? Уақыт өте келе сахна өзі-ақ тәрбиелеп алады. Ал әйел болу, жар болу, ана болу ол өмірдегі үлкен мектеп.

- Әр жақтан әр түрлі сын сөздер, өсек-аяң айтылып жатады. Көңіл болесіз бе?

- Мен тауға көп барамын. Табиғатпен көп сырласамын. Күшім бітіп, әлсірей бастағанда табиғатқа жүгінемін. Күшім бітті-ау дегеннің өзінде, өз ішімнен өзім тағы бір күш табамын. Тауға қарасаңыз биік қой. Шыңы да биік, еңсесі де биік, өзі де биік. Өзімді сол тауға теңестіремін. Қарап тұрсаңыз, таудың етегінде майда-майда тастар, ағаштар бар. Мен де солай бәрінен өзімді биік қоямын. Ешкімнің сөзіне, өсегіне көңіл бөлмеуге, басымды ауыртпауға тырысамын. Әркім әрқалай айта береді. Өмір сүру жеңіл. Егер өсекке, сыбысқа қарай берсең, өмір сүруге болмайды.

- Алда аналар мерекесі келе жатыр. Анаңыз жайлы да айта кетсеңіз...

- Құдай қаласа, осы наурыз айында анам алпыс жасқа толады. Кеше Карина Абдуллинаның бір сұхбатын тыңдадым. Онда Каринаның: “Менің бақытты болуыма бір-ақ нәрсе жетпейді. Ол анамның өмірден ерте өткені” деген сөзін естіп, жылап жібере жаздадым. Жаныңда анаңның болмауы қандай қорқынышты. Құдай содан сақтасын! Менің дәл қазіргі барым да, байлығым да, базарым да - анам. Сол кісінің қолдауымен, қанаттандыруымен осылай ұшып шарықтап жүрміз ғой. Дүниедегі ең асыл, ең қымбат не десе, мен анамды айтар едім.

- Еліміздің аналарына тілегіңіз...

- Іштегі жақсы сөзің сыртқа шықса, қадірі кетеді дейді ғой. Аналарға, жалпы адамдарға тілейтінім, амандық! Жер бетінде соғыс болмаса екен! Еліміз тыныш, жұртымыз аман болсын! Патшамызға Алла сабыр берсін! Өсіп келе жатқан ұрпағы, елі қуанта берсе анаға одан асқан бақыт жоқ қой. Еліміздің аналары аман болсын!

-Әңгімеңізге рахмет! Өнеріңіз өрлей берсін!

Сұхбаттасқан Г.ҚОЙЛЫБАЙ.

БОКСШЫЛАР «ДӘРІДЕН КҮШ АЛАДЫ» ДЕГЕН БОС СӨЗ

Оңтүстік Қазақстан облысының атынан Олимпиадаға баратын боксшы екеу болса, соның бірі - Еркебұлан Шынәлиев. Америка төрінде атой салған жігітіміз қазір Бейжіңде өтетін Олимпиадаға дайындалып жүр. Жақында әріптестерімен бірге Ресейде дайындық өткізіп қайтқан болатын. Біз ел сенімін арқалаған бауырымызды әңгімеге тартқан едік.
– Әңгімені жанкүйер қауымға танылған сәтіңнен бастасақ. Қазақстан құрамасы сапында алғаш рет ірі жарысқа қатыстың да, көзге түстің. Оған дейін мықтылығыңды дәлелдеуге қандай кедергілер болды?
– Әуелі жастар құрамасынан ересектер қатарына өтуіме жасымның жетпеуі кедергі болды. Әрине, жастар құрамасында жүргенде жаман болған жоқпын. Қазақстанның үш дүркін жеңімпазы болдым. 2006 жылы Африкада өткен Әлем біріншілігінің күміс жүлдегері атандым. Одан да басқа шетелдерде өткен жарыстардан құрқол қайтқан кездерім аз болды. Ал Чикаго қаласындағы Әлем чемпионаты басталар кезде менің Қазақстан құрамасының сапында жүргеніме 4-5 ай болған еді. Бірден бапкердің көзіне түсіп, жарысқа қатысуға мүмкіндік алдым. Спортта биікке шығу оңай емес. Бір-бірін көреалмаушылық деген сияқты жайттар да кездесіп жатады. Бастысы, ондай қиындықтарға мойымау керек деп ойлаймын. Сонда еңбегіңнің жемісін де көресің.
– Құрамаға алынғаныңда 81 келіде Ердос Жаңабергенов өнер көрсетуші еді. Кейін оны жаңа салмаққа өтіпті деп естідік...
– Менің алдымда 81 келі салмақта өнер көрсеткен Ердос Жаңабергеновтің 2005 жылы Қытайда өткен Әлем чемпионатында жеңімпаз атанғанын білесіздер. Ол кейін дайындық кезінде белінен ауыр жарақат алып, жат-тығу жасай алмай жүрді. Оның үстіне, салмағы да өсіп кетті. Сондықтан бұл салмақта Дамир Буданбеков Америкаға мені алып кетті.
Негізі Біржан Жақыпов жеңімпаз болып қайтқан Тайландтағы жарысқа Ердос та баруы керек еді. 91 келі салмаққа өтіп, дайындалып жүрген. Жаттығу кезінде беліндегі жарақаты сыр беріп, Германияға ота жасатуға кетті.
– Астанада өтетін лицензиялық жарысқа қатыса ала ма?
– 91 келі салмақта өнер көрсететін боксшы Астанаға бармайды. Президент кубогына 51, 54, 57, 60 және 91 келіден жоғары салмақтағы боксшылар қатыспақ. Яғни, бапкер бес жігітке сенім артып отыр.
– Бокста биіктен көріну қаншалықты қиын болса, шыққан биігіңді ұстап қалу одан да қиын. Сенім артқан елдің үмітін ақтау жолындағы дайындығың қалай?
– Қазір қызу дайындық үстіндемін. Таңертең және кешке екі сағаттан жаттығып жүрмін. Басқа мәселеге қатысты жұмыстармен бапкер, демеушілер айналысар. Менің басты міндетім, бабымды жоғалтып алмау. Сондықтан жаттығудан бас алмаймын. Себебі, Олимпиадаға жолдама алғаннан кейін, халық бізге үміт артып отыр. Көпшіліктің үмітін ақтауым керек.
– Көбінесе боксшылар төрешілер тарапына сын айтып жатады. Ал лайықты өнер көрсетуге ауа райының кері әсер еткен жағдайы болған ба?
– Иә, ондай жағдай менің басымнан өткен. Африкада өткен жастар арасындағы Әлем чемпионатына қатысатын кезімде өзімді жайсыз сезіне бастадым. Ауа райы жақпады ма, әлде, басқа да себептер болды ма, ауырып қалдым. Негізі бізді жарыс өтетін елге табиғатына үйренуіміз үшін он күн бұрын алып барады. Сол он күннің үшеуінде ауырып жүрдім де, бір аптада қайта бабыма келдім. Ал одан кейін қанша жарысқа барсам да, ондай жағдай қайталанған емес.
– Боксшыларға бір дәрі береді екен. Оны не үшін пайдаланасыңдар?
– Төзімділігіңді арттыру үшін түрлі дәрумендер беріледі. Боксшы бір жаттығуда 2-3 келі салмақты термен шығаратын болса, соның орнын толтыратын дәрі беріледі. Яғни, ол ағзаны қайта қалпына келтіретін дәрумен. Ал “боксшылар дәріден күш алады екен” деген бос сөз. Ол дәріні ішкенге күшті болып кетпейсің. Барлығы өзіңе, жаттығуыңның деңгейіне байланысты.
– Жеңіске жету үшін түрлі қулыққа баратындар бар. Жарыс иелері өздерінің спортшысын жеңімпаз ету үшін қарсыласына басқа дәрі беріп жібермей ме?
– Құдай сақтасын, ондай жағдай болған емес. Біз пайдаланатын заттардың бәрі тексеруден өтеді ғой.
– Азияда бокс үлкен қарқынмен дамып келеді. Сары құрлықта Қазақстан боксшыларының жолын қай елдің спортшылары жиі кеседі?
– Қытайда бокс соңғы жылдары қатты дамып кетті. Бұл елдің үш-төрт салмақта алдына жан салмай келе жатқан мықты боксшылары бар. 48 келі салмақтағы Зу Шоминь деген жігіт екі дүркін Әлем чемпионы атанды. 57 келі салмақтағы спортшы да сүрінбей жүр. 69 келіде өнер көрсететін Қанат Исламов деген қазақ жігіті де Қытайдың абыройын асқақтатып келеді. Қытайдан бөлек, Өзбекстанның боксшылары да оңай шағылар жаңғақ емес. Қазіргі күні бокс Еуропада да жақсы дамуда. Ағылшындар мен италиялық спортшылардан мықтылар шығып жатыр. Қысқасын айтқанда, қарсыласты бағаламауға болмайды. Кез келген боксшының өз әдіс-айласы бар. Сондықтан қандай қарсылас болсын, еркінсуге болмайды.
– Көптеген елдерде жаттығуларда жүріп, олардың жағдайынан хабардар болған шығарсың. Қазақстанда боксшыларға лайықты қолдау көрсетіліп отыр деп ойлайсың ба?
– Жақында ғана Ресейде дайындық жасап қайттық. Әрине, олардың жағдайы бізден әлдеқайда жоғары. Боксшылардың барлық жағдайы жасалған және жастарына үлкен көңіл бөледі. Ал Қазақстанға келсек, Олимпиадаға жолдама алғанға дейін менің жағдайым нашарлау еді. Әлем чемпионатында өзімді көрсеткеннен кейін, барлық жағынан көмек көрсетіле бастады. Сол сияқты жастарға да қолдау көрсетілсе, нәтиже бұдан да жоғары болары анық.
– Басқа елді айтпай-ақ қояйық, Қазақстанның өзінде басқа облыстың мамандары мықты боксшыларды өздеріне шақырып жатады. Саған ұсыныс айтқандар болды ма?
– Астана мен Алматыға шақырды. Бірақ, ешқайсысын қабыл алған жоқпын. Себебі, мені Мырзағали Айтжанов есімді бапкерім бала кезімнен жаттықтырып келеді. Осындай жетістікке жетуіме ол кісінің сіңірген еңбегі зор. Жерлестерім сенім артып отыр дегендей... Сондықтан Оңтүстік Қазақстан облысынан кете алмаймын.
– Олар шақырғанда не айтады? Барлық жағдайыңды жасауға уәде бере ме, әлде, басқа да ұсыныстары бар ма?
– Африкада өткен Әлем чемпионатында 11 боксшының ішінен үшеуміз финалға жолдама алдық. Өкінішке орай, үшеуміз де екінші орын алдық. Соған қарамастан Тараз бен Павлодар қаласында тұратын екі спортшыға облысынан пәтер берілді. Басқа да сыйлықтар жасап жатыр. Ал біздің облыста менің қол жеткен жетістігім көзге де ілінбеді. Пәтер бермеді демей-ақ қояйын, “облыстың атын шығардың ғой” деп, құрмет көрсеткен де жоқ. Ал Әлем чемпионатынан қола жүлдегер атанып келгеннен кейін пәтер беруге уәде берген. Көреміз, уәделерін орындай ма, жоқ па?
– Мақсатың белгілі, Олимпиада алтынын қоржынға салсам дейсің. Ал қандай арманың бар?
– Қазір менің мақсатым мен арманым бір жерде тоғысып тұр. Құдай қаласа, Олимпиадада жеңіске жет-сем деймін. Және қандай нәтижеге жетсем де, онымен тоқтап қала алмаймын. 2012 жылы өтетін Олимпиадада бағымды сынап көремін.
– Оқырман қауымға айтар тілегің бар ма?
– Барлық оқырман қауымға амандық тілеймін. Әйелдер қауымын келе жатқан мерекелерімен құттықтаймын! Тағы бір айтарым, ата-аналар бала-шағаларын спортқа баулып өсірсе екен. “Боксқа бермеймін, денсаулығына зиян” деп, үркудің қажеті жоқ. Қанша жыл шаршы алаңда тер төккен Ермахан Ибрагимов, Нұржан Сманов сынды саңлақтарымызды көріп жүрсіздер. Он екі мүшесі сау, аман-есен халқына қызмет етіп жүр. Балаларыңызды тек бокс қана емес, кез келген спорт түріне баулуға болады. Ертеңгі күні олар да Қазақстанның абыройын асқақтатса деп тілеймін!
– Рахмет! Өзіңе де сәттілік тілейміз!
Сұхбаттасқан
Мұрат СЕРІКБАЙҰЛЫ.